«Latyndy golda!» жобасы аясында

«Әліпби – ұлт болашағының негізі»

атты эссе байқауы

«Аудандық тілдерді оқыту» КММ-нің директоры Гүлнұр Аубакированың жетекшілігімен аталмыш орталықтың оқу залында Ұлыстың Ұлы күні Наурыз мерекесі қарсаңында «Болашаққа бағдар: рухани жаңғыру» бағдарламалық мақаласына орай «Latyndy golda!» жобасы аясында «Әліпби – ұлт болашағының негізі» атты сырттай эссе байқауының жеңімпаздарын марапаттады. Аталмыш орталықтың мамандары түскен эсселердің мәні мен мағынасына, сөзді қолдану тәсіліне, жазу стиліне, латын қарпінің жазылуы мен графикасын дұрыс қолдануына баға бере отырып байқаудың жеңімпаздарын анықтады. Аудандық кітапхананың қызметкері, әріптесіміз Әмірхан Ағытаев бас жүлдеге ие болды. Құттықтаймыз!

Аудандық кітапхана.

Кітапханадағы «Әз, Наурыз!»

атты кітап көрмесі

Аудандық балалар кітапханасының оқу залында жас оқырмандар мен мектеп оқушыларына Ұлыстың Ұлы күні Наурыз мерекесі қарсаңында «Әз, Наурыз!» атты кітап көрмесі ұйымдастырылды. Көрменің мақсаты: бүкіл түркі халықтарының ұлық тойы – Наурыз мерекесін ұлттық салт-дәстүрімізбен, әдет-ғұрпымызбен байланыстыра насихаттап, ұрпақтардың өз ұлтына деген сүйіспеншілігін арттыру. Мерекеге арналып жасалған кітап көрмесі Наурыз тойының табиғатын, шығу төркінін, мазмұны мен мәнін, халықтың мәдени-рухани өміріндегі орнын баяндап, қазақ халқының салт-дәстүрі, әдет-ғұрпы мен қолөнері, ұлттық тағамы туралы насихаттау. Кітап көрмесінде халқымыздың ұлттық мерекесі Наурыздың шығу тарихы, жыл басы, жыл қайыру, жыл, ай аттары тәрізді ұлттық құндылықтар туралы әдебиеттер қойылған. 

Сонымен қатар қолөнер – халықтың ұлттық мұрасы, мәдениеті мен өнерінің айқын көрінісі. Соған орай ұлттық киім, қолөнерге байланысты әдебиеттер мен қазақ халқының дастарханы, ұлттық тағамдары туралы басылымдарды көруге болады. Көрмедегі кітаптармен мерзімді басылымдар бетіндегі мол мағлұматтар өз халқының мәдениеті мен этнографиясын танып білгісі келетін балаларға пайдасы мол болмақ. Көрме айдың аяғына дейін созылмақ.

Әмірхан АҒЫТАЕВ,

аудандық кітапхананың қызметкері.

«Латынды қолда!» жобасы аясында

Жаңғыру — жазудан басталады

Елбасының «Болашаққа бағдар: рухани жаңғыру» атты мақаласында «Қазақ тілін біртіндеп латын әліпбиіне көшіру жұмыстарын бастауымыз керек. Біз бұл мәселеге неғұрлым дәйектілік қажеттігін терең түсініп, байыппен қарап келеміз және оған кірісуге Тәуелсіздік алғаннан бері мұқият дайындалдық. Яғни, 2025 жылға қарай іс қағаздарын, мерзімді баспасөзді, оқулықтарды, бәрін де латын әліпбиімен басып шығара бастауға тиіспіз», – деген еді. Осы уақытта аудандағы «Аудандық тілдерді оқыту орталығы» КММ-де мемлекеттік бағдарламалар бойынша атқарылуы тиіс жұмыстар кезек-кезегімен орындалуда. Латын қарпіне көшу мәселесінде аталмыш орталықтың мамандары жан-жақты талқылау өткізіп, оған қоғамның болашаққа бейжай қарамайтындығын көрсетіп келеді. Аталмыш оқыту орталығының директоры Г.Аубакированың сөзінше, бұл қуанарлық жайт. Себебі, әрбір азаматтың ұстанымы елдің болашағын айқындауға негіз болады дейді.

Сондықтан, латын әліпбиіне көшу ана тіліміздің одан ары дамуына және оның қолданылу аясының кеңеюіне әкеліп және түркі тілдес халықтарының барлығымен жақындастырады деп санаймын. Бұдан басқа қазақ тілінің айтылу ерекшелігі, айтылу заңдылықтары да қалпына келетініне сенімдімін. Менің ойымша, қазақ тілін білетін, қазақ тілін түсінетін әрбір азамат латын қарпін де түсініп, емін-еркін оқып кететіндеріне еш күмәнім жоқ. Латын әліпбиіне толық көшу мәселесі әлі өз жалғасын табады. Бұл әлемдегі барлық қазақтарды біріктіретін ең маңызды факторлардың бірі болмақ. Болашаққа бастар жолда бірліктен айырылмауға тиіспіз. Ендеше, рухани жаңғырудың темірқазығына айналған латын әліпбиіне өту – уақыт талабы.

Әмірхан АҒЫТАЕВ,

аудандық кітапхананың қызметкері.

1 наурыз - Алғыс айту күніне орай

«Ризашылық пен Алғыс»

атты кітап көрмесі

Ұлт Көшбасшысы  Н.Ә.Назарбаев: «Қазақстан Халықтар Ассамблеясы құрылған күн – 1 наурызды жыл сайын барлық этностың бір-біріне мейірбандық танытып, ол адамдарды өз туғанындай қабылдаған қазақтарға Алғыс айту күні ретінде атап өтуін белгілеген еді. 1 наурыз – Алғыс айту күні қарсаңында аудандық балалар кітапханасының кітапханашылары С.Омарова мен А.Мырзағалиева Ш.Уәлиханов атындағы орта мектебінің жанындағы интернатқа барып, ондағы оқушыларға «Ризашылық пен Алғыс» атты жылжымалы кітап көрмесімен таныстырып, шолу жүргізді. Көрмеде әр түрлі ұлт өкілдерінің суреттері мен мерзімді баспасөз беттерінде жарияланған мақалалар қойылған. 

Негізгі мақсат - осы көрме арқылы балаларға ризашылық пен алғыс туралы түсінік беру, үлкен кішіге сүйіспеншілігін, сыпайылық қарым-қатынастарын дамыту, әдептілікке, кішіпейілдікке тәрбиелеу мақсатында. Сонымен қатар жаңадан түскен әдебиеттер мен мерзімді басылымдар «Айгөлөк», «Мөлдір бұлақ», «Ерке бала», «Аңыз адам» және тағы да басқа балалар туралы жорналдар оқылып, ақпарат минуты ұйымдастырылды. Өткізілген іс шарада оқушылар белсендігі жоғары деңгейде болды, өздерінің Отан Анаға, ата-анаға, ұстазға, өзге ұлт өкілдеріне, досына туған жерге деген ыстық лебіздерін ризашылықтарын білдірді.

Ш.Уәлиханов атындағы орта мектебі жанындағы интернаттың директоры Айдын Ералин кітапханашыларға, оқушыларға үлкен алғысын білдірді. Шара соңында «Рахмет» туралы әсем ән орындалып, шараның сәнін келтірді.

А.АГИТАЕВ,

аудандық кітапхананың қызметкері.

1 наурыз - Алғыс айту күніне орай

«Алғыс айту - ынтымақтың берекесі»

«....мүмкіндігі шектеулі азаматтарға көбірек көңіл бөлу керек.

Ондай адамдарға қамқорлық көрсетілуге тиіс – бұл

өзіміздің және қоғам алдындағы парызымыз»

                                                                                                           
                                                                                   Н.Ә.НАЗАРБАЕВ.

1 наурыз – Алғыс айту күніне орай аудандық кітапхананың оқу залында «Алғыс айту  - ынтымақтың берекесі» атты тақырыппен мүмкіндігі шектеулі балаларға арналған «Сұрақ-Жауап» ойыны өткізілді.

Негізгі мақсат - мүмкіндігі шектеулі балалардың өзге азаматтармен тең құқылы түрде ақпарат алуына, бос уақыттарын тиімді өткізуге, саналарына сыйластық, ізгілік қасиеттерді сіңіру, аға-ұрпақ өкілдеріне алғыс айта білуге баулу, алғыс пен ризашылықтың мағынасын ұғындыру, «Сұрақ-Жауап» ойыны арқылы танымдық қабілеттерін дамытуға ықпал ету, жақсы қасиеттерге тәрбиелеуге ат салысу. Сонымен қатар мүмкіндігі шектеулі балалардың өздеріне түрлі смайликтер арқылы адамның көңіл-күйін білу, ойнатуға мүмкіндік беру арқылы сөйлеу, қозғалу мүмкіндіктерін кеңейтуге ықпал ету, бойларындағы шығармашылық қабілеттіліктерін ұштауға көмектесу болатын. Бұл орайда үстел үсті түрлі-түсті шарлар мен смайликтер толы болды. Ойын барысында топ-топқа бөлінген мүмкіндігі шектеулі балалар сұрақтарды мұқият тыңдап, жауаптарын лезде айтып берді. Өздері таңдаған смайликтер арқылы көңіл-күйлерін білдіріп, белсенділік танытты. Сонан соң қолды қимылдата отырып жасалатын бірнеше деңгейден тұратын ойындар ойнатылды. Ойынның мазмұнында мүмкіндігі шектеулі балалардың танымдық қабілетін дамытуға ықтимал жасайтын мүмкіндіктер молынан. Бұл күні мүмкіндігі шектеулі балаларға, кітапханада оқырмандар игілігі үшін ұйымдастырылып жатқан жұмыс түрлері таныстырылып, «Алғыс айту – ынтымақтың берекесі» атты бейне ролик көрсетілді. 

Шара соңында «Жұмыспен қамту және әлеуметтік бағдарламалар бөлімінің» мүмкіндігі шектеулі балалармен жұмыс жасау маманы Гүлбаршын Марқабайқызы кітапханашыларға алғыстарын білдірді. Кітапхананың ұйымдастыруымен өткен шарада мүмкіндігі шектеулі балаларға кітапханашылар рахмет айтып, сыйлықтар тарту етілді.

А.АГИТАЕВ,

аудандық кітапхананың қызметкері.